हरिहरपुरगढीमा आँखा शिविर हुने

सिन्धुली । सिन्धुलीको हरिहरपुरगढीमा सल्यक्रिया सहितको आँखा सिविर हुने भएको छ । हरिहरपुरगढी गाउँपालिकाको आयोजना तथा सिन्धुलीय श्रेष्ठ समाजको संयोजनमा माघ ११ गतेदेखि १५ गतेसम्म हरिहरपुरगढीका ८ वटै वडामा निःशुल्क आँखा शिविर सञ्चालन हुने भएको हो । हरिहरपुरगढी गाउँपालिकाले तिलगंगा आँखा अस्पतालसँगको सहकार्यमा आँखा शिविर आयोजना गर्न लागेको उक्त गाउँपालिकाका अध्यक्ष कारसाङ लामाले जनाए । हरिहरपुरगढीका नौ वटै वडामा आयोजना गरिने आँखा शिविरबाट छनोट भएको मोतियाविन्दुका विरामीको गाउँपालिका कार्यालय झनझनेमा माघ १६ र १७ गते शल्यक्रिया गरिनेछ । निःशुल्क शिविर सञ्चालन र शल्यक्रिया गर्ने विषयमा हरिहरपुरगढी गाउँपालिका र सिन्धुली श्रेष्ठ समाजबीच आइतबार सहमतिमा हस्ताक्षर भएको हो । हस्ताक्षर कार्यक्रममा हरिहरपुरगढी गाउँपालिका अध्यक्ष कार्साङ लामा, उपाध्यक्ष अनिता राई सहित गाउँपालिकाका कार्यकारी अधिकृत, स्वास्थ्य शाखा प्रमुख, स्वास्थ्य चौकीका इन्चार्जहरु, वडा अध्यक्षहरुसहितको उपस्थिति रहेको थियो ।
आँखा सिविरले गाउँपालिकाका विपन्न वर्ग, बालबालिका तथा बृद्धबृद्धाहरुले सुविधा पाउने छन् । आर्थिक अभावका कारण समयमा सुविधासम्पन्न आँखा अस्पतालमा आँखा जचाउन समेत नपाएका स्थानीयले आँखा जाँचपछि गाउँमै सल्यक्रिया समेत गर्न सक्ने सिन्धुलीय श्रेष्ठ समाजका सचिव हरिकृष्ण श्रेष्ठले जनाए ।