बोलेरो दुर्घटना हुँदा १२ जना घाईते

सिन्धुली । सिन्धुलीको दुधौली नगरपालिका १३ अरुणठाकुर स्थित कामीटार गएराती बोलेर दुर्घटना हुँदा १२ जना घाईते भएका छन् । दुई जनाको अवस्था गम्भीर रहेको प्रहरीले जनाएको छ ।
दुधौलीबाट अरुणठाकुर तर्फ जाँदै गरेको स१च १४६९ नम्बरको पिकअप बोलेर दुधौली–अरुणठाकुर ग्रामिण सडकामा चिप्लीएर दुर्घटनामा परेको जिल्ला प्रहरी कार्यालय सिन्धुलीकी प्रहरी प्रमुख रन्जु सिग्देलले जानकारी दिईन् ।
घाइते मध्ये दुई जनाको अवस्था गम्भीर रहेको छ । गम्भीर घाइते हुनेहरुमा दुधौली नगरपालिका १३ बस्ने वर्ष २८ का यमकुमार मगर र उदयपुरगढी ३ बस्ने इन्दीरा मगर रहेका छन् । उनिहरुदुबै जनालाई थप उपचारका लागि सिरहाको मिर्चैया तर्फ पठाइएको सिग्देलको भनाई छ ।
दुर्घटनामा परि दुधौली नगरपालिका १३ का ५८ वर्षीय प्रेमबहादुर मगर, उनकी श्रीमति वर्ष ५३ की सुनिता मगर, सोही ठाउँका वर्ष ११ का सुदर्शन कार्की घाइते भएका छन् । दुर्घटनामा दुधौली नगरपालिका ११ का वर्ष १७ का सविना सुनुवार, वर्ष १८ की तुलसा कार्की र वर्ष ६० का तिलकबहादुर मगर घाइते भएका छन् ।
यस्तै दुधौली नगरपालिका १३ का वर्ष १४ की निषा बुढाथोकी, दुधौली १० की वर्ष १२ की सुसिला कार्की र सिन्धुलीकै फिक्कल गाउँपालिका १ को कमला आलेमगर र लिला सुनुवार घाईते भएका छन् । उनिहरुको दुधौली स्थित स्वास्थ्य संस्थामा उपचार भईरहेको प्रहरीले जनाएको छ ।